Ժորա Հովհաննիսյանը Կամերային թատրոնի դերասան է 2013 թվականից։ Նա խաղում է ինչպես դրամատիկ, այնպես էլ կատակերգական և երաժշտական ներկայացումներում․ «Կախարդական պարահանդես», «Կառավարական համերգ», «Կաբարե Restart», «Ճերմակ արագիլներ», «Շոու #3», «Ռոմեո & Ջուլիետ», «Սև արկղ», «Կուլիսներում կամ թատրոնի անատոմիա» և այլն:
Ժորա Հովհաննիսյանը նկարահանվել է նաև մի շարք կինո և հեռուստանախագծերում․ «Դեպի երազանք», «Մեղրամիս», «Գործակալ 044», «Հանդիպման վայր», «Ֆուլ հաուս», «Դոմինո», «Մեր բակը 25 տարի անց» և այլն։
Ժորան հիմնադրել և որպես սոլիստ հանդես է գալիս «Հալվա» երաժշտական բենդում։ Նա տիրապետում է մի քանի երաժշտական գործիքների՝ շվի, հարվածային գործիքներ, կիթառ։

Դերասան Ժորա Մարտիրոսյանը Կամերային թատրոնում աշխատանքը սկսել է որպես ռեկվիզիտոր 2016թ.-ին։ 2018թ.-ին նրան արդեն վստահեցին «Ռոմեո և Ջուլիետ» ներկայացման գլխավոր հերոսի՝ Ռոմեոյի դերը։  Այժմ Ժորա Մարտիրոսյանը զբաղված է Կամերային թատրոնի գրեթե բոլոր ներկայացումներում՝ «Ռոմեո և Ջուլիետ», «Համլետ», «Ի զե՛ն», «Կաբարե Restart», «Շոու #3», «Ինչ տարբերություն, թե ում հետ», «Ծննդյան վկայական», «Fe – Show» և այլն։
2023թ․-ին Ժորա Մարտիրոսյանը փորձեց իր ուժերը նաև որպես ռեժիսոր՝ կամերային թատրոնի հանդիսատեսի դատին հանձնելով «Բ-1427» ներկայացումը։
Ժորա Մարտիրոսյանը նկարահանվել է նաև Արա Երնջակյանի «Ժաննա» գեղարվեստական ֆիլմում, ինչպես նաև «Հանդիպման վայր», «Թունավոր սեր», «Մահվան ջոկատ», «Արյունոտ խաղադրույք» հեռուստասերիալներում։

Սուրեն Պողոսյանի մասնագիտական գործունեությունը սկսվել է Մխիթար Սեբաստացի կրթահամալիրում, որտեղ ուսանել է դերասանի վարպետություն։ Ուսանողական տարիներից տարբեր բեմահարթակներում խաղացել է «Ամուսնություն», «Իմ սիրտը լեռներում է», «Կոշիկ», «Օթելլո», «Խելագարի հիշատակարան» ներկայացումներում, ինչպես նաև «Հիսուս Քրիստոս Գերաստղ» ռոք-օպերայում՝ Հիսուսի կերպարում։ Մասնակցություն է ունեցել «Սանսեթ Բուլվար» մյուզիքլում։ Աշխատել է Նորվեգիայի Ստելլա Պոլարիս թատրոնում։
Սուրեն Պողոսյանի մուտքը Կամերային թատրոն եղել է 2017թ.-ին՝ «Ռոմեո & Ջուլիետ»  ներկայացումով։ Այժմ զբաղված է խաղացանկային «Կաբարե Restart», «Շոու #3», «Կառավարական համերգ», «Fe Show» և «Կուլիսներում, կամ թատրոնի անատոմիա» ներկայացումներում։
Սուրենը նկարահանվել է «The Eye of God» հայ-շվեդական և «Hello Au Revoir»՝ հայ-անգլիական ֆիլմերում, «Purgatory»` ամերիկյան սերիալում։
Դերասանական կարիերային զուգահեռ ակտիվորեն զբաղվել է նաև երաժշտական գործունեությամբ։ Մասնակցել և մեծ հաջողություններ է գրանցել մի շարք փառատոներում․ «Новая Волна» երգի մրցույթի պոլուֆինալիստ, Ֆրանկոֆոնիայի երգի մրցույթ-փառատոնի 3-րդ հորիզոնական, 2019թ.-ին «Славянский базар» միջազգային երգի մրցույթի հայաստանյան ընտրության ֆինալիստ, 2018թ. Եվրատեսիլ երգի մրցույթի հայաստանյան ազգային ընտրություն, 2017թ. Երգի թատրոնի «Ամենից ամենա» երգի մրցույթի ֆինալիստ, 2017թ. «Արտ ֆեստ» փառատոնի տարվա երգիչ, 2017թ. «21TV awards» տարվա լավագույն երգիչ, 2015թ. «Կովկասի առաջնություն» երգի միջազգային մրցույթի «տղամարդու լավագույն վոկալ» 3-րդ հորիզոնական, 2014թ․ «Ռեզոնանս» միջազգային փառատոնի լավագույն փոփ վոկալ 1-ին տեղ, լավագույն ջազ վոկալ 2-րդ տեղ։ Կամերային թատրոնի բեմին երկու մենահամերգ է ունեցել։ Նաև միջազգային համերգային շրջագայություն է ունեցել Ռուսաստանում, Նորվեգիայում, Շվեդիայում և Լեհաստանում։ Սուրեն Պողոսյանը Վիվառո Մեդիայի լրատվական թողարկման հաղորդավարն է։

Անդրանիկ Հարությունյանը Կամերային թատրոնում գործունեությունը սկսել է 2003թ․-ից, սկզբում որպես բեմի բանվոր, ընթացքում ներգրավվել է մանկակական ներկայացումներում։ Առաջին դերը «Տռուլյայա» ներկայացման մեջ էր։ 2005թ-ից արդեն ամբողջությամբ ներգրավվել է թատրոնի խաղացանկային գրեթե բոլոր ներկայացումներում․ «Նազար, Նազար՝ մինչև վերջ», «Ներոն», «Անտեր Ground», «Կաբարե», «Սասունցի Դավիթ Կոպերֆիլդ», «Ալբանիա +» , «Կառավարական համերգ», “Արմմագեդոն”, «Ամեն օր Ամանոր», «Լուսատտիկների կանչը», «Շատ love story», «Սկոտչ և Վիսկի», «Ի զե՛ն», «Միսս Հայաստան» և այլն:
Անդրանիկ Հարությունյանը մասնակցություն է ունեցել նաև մի շարք անտիպրիզային  ներկայացումներում. «Ստոպ»,  «Նո քոմենթ», «Գլամուրային չոբաններ», «Քիթ-քաթ», «Կապիր ինձ մահճակալին», «Բումերանգ», «Անտանիք ընտանիք», «Ճտերն աշնանն են հաշվում», «Շենքում իրավիճակ է փոխվել», «Հեքիաթ մի պատմիր» և այլն։
Անդրանիկը հանդիսատեսին ավելի հայտնի է հեռուստատեսային նախագծերից և հումորային ֆիլմերից: Նա նկարահանվել է «Ալաբալանիցա», «Սուպեր մամա 1,2», «Փեսացուն կրկեսից», «Իմ մեծ հայկական հարսանիքը», «Անհաջողակները», «Արամմա», «Սիթ Քոմ», «Մեծ պատմություն փոքր քաղաքում, «Կարգին սերիալ»,  «Ժաննա», «Կարգին հաղորդում», «32 ատամ», ինչպես նաև «Կարգին սկետչեր», «Խոպանի տեսություն», «Լա կասա դե պապա», «Քեռանկյունի», «Լինում է, չի լինում», «Լինել, թե չլինել» սիթքոմերում:
Դերասանը նաև վարել է «Արդյոք ովքեր են», «Բարի լույս» , «Դեսից դենից» ծրագրերը տարբեր հեռուստաալիքներով և ռադիոկայաններում:
Կատարում է նաև հումորային ժանրի երգեր այնպիսի նախագծերում, ինչպիսիք են «Դեպուտատի շոու»-ն և «Անդրոիդը»:
Անդրանիկ Հարությունյանը նաև հանդես է գալիս որպես հեռուստապրոդյուսեր։

Իրինա Դանիելյանը 1987թ.-ից Երևանի պետական Կամերային թատրոնի դերասանուհի է: Հենց սկզբից ներգրավված է եղել թատրոնի խաղացանկային ներկայացումներում. «Cabaret», «Հայք», «Ոչ սովորական համերգ», «Կառավարական համերգ»,  «Նազա՛ր, Նազա՛ր՝ մինչև վերջ», «Պարոնա՛յք, ամեն ինչ կործանվում է, բայց դեռ կարելի է ապրել և զվարճանալ» (ռուսերեն տարբերակ), «Տիտանիկ, made in Armenia», ինչպես նաև՝ Լուսինե Երնջակյանի «Ռոմեո & Ջուլիետ» նորարարական բեմադրության մեջ:
1995–1998թթ.-ին Հայաստանի Երգի պետական թատրոնում եղել է երգչուհի և հանդիսավար: 1996թ.-ին մասնակցել է «Խաթաբալադա» ներկայացման բեմադրական աշխատանքներին և ֆիլմի նկարահանումներին: 1996թ.-ին նկարահանվել է «Մեր բակը 2» ֆիլմում:
2000–2006թթ.-ին մասնակցել 9 մասից բաղկացած «Մեր Այբբենարանը» մանկական ուսուցողական ֆիլմաշարի ստեղծմանը:
2002թ.-ին խաղացել է «Իմ մեղքը» («Մեա Կուլպա») տրագիկոմեդիայում, իսկ 2011թ.-ին նկարահանվել բեմադրության տեսաֆիլմում: Մասնակցություն է ունեցել նաև «Ջին Ջան» անտրեպրիզային ներկայացմանը:
Իրինա Դանիելյանը մասնակցություն է ունեցել նաև «Աստղային պատերազմներ», «Սիթքոմ»,  «10 պակաս»,  «Դանիելյան + Դանիելյան», «Տիկին Ջեմիկ», «Ընտանյոք հանդերձ», «Կարմիր խնձորներ», «Երանի», «Ժիրայր Գլենց» նախագծերին:
2013թ.-ից Հայաստանի Հանրային հետուստաընկերությամբ վարել է «Մեր մեջ ասած» նախագիծը:
Իրինա Դանիելյանը մասնակցել է Միլանի «Vogue» ամսագրի «Նորաձևության վերածնունդը թատրոնում» խորագրով ֆոտոշարքին: 

Թատերական ինստիտուտում սովորելու տարիներին Ավետ Զոհրաբյանը զբաղված է եղել Համազգային և Տիկնիկային թատրոնների խաղացանկային ներկայացումներում։
Կամերային թատրոն մուտքը եղել է 2021թ․-ին «Համլետ» ներկայացումով, հենց  Համլետի դերով։
Ավետ Զոհրաբյանը զբաղված է նաև Կամերային թատրոնի խաղացանկային «Ռոմեո և Ջուլիետ», «Փնտրվում է տղամարդ» և «Սերն ինչպես կինոյում» ներկայացումներում։ Ավետ Զոհրաբյանը Հանրային հեռուստաընկերության կրկնօրինակման բաժնի դերասան է։ Ուսանել է Առաջին ալիքի Մեդիաակադեմիայի «հաղորդավարական արվեստ» բաժնում։ Նկարահանվել է «Գարուն ա» ֆիլմում։ Խաղացել է «Սանսեթ Բուլվար» բրոդվեյան մյուզիքլում։