Հասմիկ Տեր-Կարապետյան

Ծնվել է 1954 թ. հունվարի 23-ին:

Դերասան Զարեհ Տեր-Կարապետյանի և թատերագետ Վարսենիկ Գրիգորյանի դուստրն է:

Պատանեկան տարիներից նկարահանվել է մանկական տարբեր հաղորդումներում, հեռուստատեսային ներկայացումներում:

1974 թ-ին ավարտել է Երևանի գեղարվեստաթատերական ինստիտուտի դերասանական բաժինը:

Ուսանողական տարիներից ստեղծագործական գործունեությունը կապել է Երևանի Հ.  Ղափլանյանի անվան պետական դրամատիկական թատրոնի հետ:

1978 – 1991 թթ. եղել է Երևանի Պատանի հանդիսատեսի թատրոնի դերասանուհի:

1986 թ. արժանացել է շքանշան-մրցանակի՝ Մինինի «Ես մարդ եմ» ներկայացման մեջ ինը տարբեր դերեր կատարելու համար:

1991 թ. տեղափոխվել է Ավստրալիա, որտեղ ևս զբաղվել է թատերական գործունեությամբ: Սփյուռքահայ երիտասարդների համար բեմադրել է երեք ներկայացում, պատրաստել ռադիոհաղորդումների շարք` նվիրված հայ թատրոնին, դերասանուհիներին ու ժամանակակից պոեզիային:

2003 թ. «Վերջին արարը» ներկայացման մեջ մարմնավորել է Մարի Նվարդին: Ներկայացումը նվիրված էր դերասանուհու 150-ամյակին:

2006 թ. ներկայացվել է «Երկյուղած լռություն» իրատեսական էլեգիան` նվիրված մեր մեծանուն դերասանուհի Սիրանույշի կյանքին ու գործունեությանը, որտեղ Հ. Տեր-Կարապետյանը մարմնավորել է դերասանուհի Սիրանույշին: 2007թ. «Երկյուղած լռություն»  ներկայացումը բեմադրվել է նաև Շուշիում ու Ստեփանակերտում, հետագայում՝ Հայաստանի տարբեր մարզերում, մասնակցել է Մենաթատրոնի Միջազգային փառատոնին, նաև՝ Սփյուռքի հետ կապերի վարչության հետ համագործակցության շրջանակներում խաղացել է Թբիլիսիում, Հալեպում:

2002 – 2007 թթ., Հասմիկ Տեր-Կարապետյանն եղել է մանկական թատերախմբերի «Նռան հատիկ» փառատոնի կազմակերպիչներից, ինչպես նաև` «Արփի» մանկական թատերախմբի ղեկավարը:

2008 թ. – Սիրիայի Հալեպ քաղաքի Հայկական Բարեգործական Ընդհանուր Միության Հ. Ե. Ընկերակցության Ադամյան Թատերախմբի հրավերով, Համիկ Տեր-Կարապետյանը հանդիսացել է Արա Երնջակյանի «Էտյուդ կանանց մասին» ներկայացման բեմադրության երկրորդ ռեժիսորը:

Նա նկարահանվել է. «Ձայն բարբառոյ…» (ռեժ, Վ. Չալդրանյան, 1991), «Քրմուհին» (ռեժ. Վ. Չալդրանյան, 2007), «Արտիստը» (ռեժ. Զառա Սարգսյան-Կասպարյանց, 2010), «Սիմոր» (ռեժ. Դանիել Հարությունյան, 2017) և այլ կինոֆիլմերում:

2011 թ.-ից Հասմիկ Տեր-Կարապետյանը Երևանի Կամերային պետական թատրոնի դերասանուհի է:

2012 թ. լույս է տեսել նրա հեղինակած «Նամակ հայրիկիս, հասցեն` դրախտ» գիրքը:

Նույն թվականից բեմական խոսք է դասավանդում Երևանի թատրոնի և կինոյի պետական ինստիտուտում:

Երևանի Կամերային պետական թատրոնի բեմում  Հասմիկ-Տեր Կարապետյանը ներկայացնում է “Ժամանակի վարագույրը” (բեմ. ռեժ.՝ Գառնիկ Սեյրանյան) մոնոներկայացումը՝ մարմնավորելով առաջին հայ դերասանուհի մեծն Արուսյակ Փափազյանի վերելքը, հաղթանակն ու ողբերգությունը: Թատերախաղը 2015 թ. ներկայացվել է ՀԹԳՄ մոնոներկայացումների «Արմմոնո» միջազգային թատերական ամենամյա 13-րդ փառատոնում:

2017 – 2018 թթ. ՀՀ Մշակույթի նախարարության «Մշակութային կանգառ» ծրագրի շրջանակներում, Սիսիան, Աշտարակ, Սևան, Գավառ և Արթիկ քաղաքներում ներկայացվեց “Ժամանակի վարագույրը” մենաներկայացումը, և մարզերի հանդիսատեսը մեծ ոգևորությամբ ընդունեց Հասմիկ Տեր-Կարապետյանի թատերախաղը: